НАМОЗ СУННАТЛАРИНИНГ ЎНТА ФЕЪЛИЙСИ ҲАҚИДА

Яна феълий бировгаким, биликдур,
Қулоққача бийик қилмоқ иликдур.
Билиш керакки, феълий суннатларнинг бири қўлни қулоққача кўтаришдир.

Ўнг илгинг сўлға қўймоқтур яна сўз,
Яна сажда ерига тикмагинг кўз.
Қиёмда ўнг қўлни чап қўл устига қўйиш ва нигоҳни сажда ўрнига қаратиб туриш ҳам.

Рукуъ ичра илик тизга қилиб ёр,
Учани тутмоқ ул ҳолатда ҳамвор.
Рукуъда қўлни тиззага қўйиб, шу ҳолатда белни текис тутиш ҳам.

Ики овуч не ерга бўлса мансуб,
Эрур сажда арода бошқа матлуб.
Саждада кафтлар қаерга қўйилса, бошни уларнинг орасига қўйиш керак.

Сужуд айларда пайдову ниҳондин,
Қорин тиздан жудо тут, қўлни ёндин.
Ошкораю пинҳон сажда қилганда қоринни тиззадан, қўлни оёқдан узоқ тут.
Бу ҳукм эркакларга хос бўлиб, аёллар аксинча қиладилар: қорин сонга, қўлни ёнга яқин тутадилар.

Яна сўл пошна устида ором,
Қилибон қибла сори мойил ибҳом.
Чап товон устига яхши ўрнашиб, ўнг оёқ бош бармоғини қиблага қаратиб ўтириш ҳам суннат.
Бу ҳам эркакларга хос ҳукм, аёллар эса чап думбаларини ерга қўйиб, оёқларини ўнг тарафга чиқариб ўтирадилар.