ИЙМОН ҚОИДАСИНИНГ ҚИСҚАЧА БАЁНИ

Бурун ул нимаким, фарз этти Яздон,
Эрур оқилға болиғ бўлғач иймон.
Яздон – Холиқ таоло биринчи фарз қилган нарса – бу оқил инсоннинг балоғатга етганда иймон келтиришидир.
Яъни ҳар бир ақли расо инсонга Аллоҳ фарз қилган биринчи нарса – балоғатга етиши билан ўз яратувчиси бўлмиш Аллоҳ таолога иймон келтиришдир.

Анинг маънисидур тил бирла иқрор,
Кўнгул бирла инонмоғлиғ дағи бор.
Иймон – бу тил билан иқрор бўлиш ва дил билан ишонишдир.
Демак, ҳар бир инсонга Аллоҳнинг биринчи буйруғи – У Зотга дилда тўкис ишониб, шу ишончни тилда изҳор қилишдир. Бу иккисидан бири бўлмаса, киши мўмин деб эътибор қилинмайди.

Тилар бўлсанг анга ўзни етурмак,
Бил олти нимага иймон кетурмак.
Агар бунга ўзингни мушарраф қилишни истасанг, билгинки, олти нарсага иймон келтиришинг керак.
Яъни, агар иймон бахтига мушарраф бўлишни истасанг, олти нарсага иймон келтиришинг лозим. Бу олти нарсага ишониш иймоннинг бўлаклари бўлиб, улардан бири бўлмаса, иймон инобатга ўтмайди.