Китобга қарайлик!
Тасаввуф илмидан, балки жамийки илмлардан билмаган нарсаси йўкдек эди. Шунга қарамасдан, нимаики сўрасалар, айтарди:
- Китобга қарайлик!
Китобни очганда ўша масаланинг жавоби ёзилган бет очиларди. Жиллақурса, бир-икки бет олдин ё кейинда ёзилган бўларди.
«Фусус» — жондир ва «Футуҳот» — кўнгил!
Бир куни ул зотнинг мажлисида Шайх Муҳйиддин Арабий (қ.с.) ва унинг асарлари ҳақида сўз борди. Хожа Абу Наср падари буз-руквори Хожа Муҳаммад Порсонинг қуйидаги сўзини айтди:
- «Фусус ул-ҳикам» жондир ва «Футуҳот ул-Маккия» кўнгил. Кимки «Фусус»ни яхши билса, унда Ҳазрат Расулуллоҳ (с.а.в.) шариатига издошлик нияти кучаяди.

Ғазабланган тоға ва жияннинг илтимоси
Камина (яъни, Навоий) ул кишининг муридларининг биридан бу нақлни эшитдим: тоғалари хуш овозли Қуръон ҳофизи эмиш. Бир куни хизматкорига ғазаб қилиб, ёмон сўзлар билан сўкаётган эмиш. Хожа Абу Наср кириб келибди. Тоғасининг ғазаб ўти пасаймабди. Тоғасига илтимос қилибди:
- Биз учун Қуръони каримдан бирор нарса ўқиб берсангиз!
Бу илтимос, айниқса, бундай улуғ зотларга рад қиладиган илтимос эмас. Тоғаси Қуръон қироатини бошлабди ва ғазаб ўти ўз-ўзидан лутф дарёсига эврилибди.