Биринчи сўфий ва биринчи хонақоҳ
Аввал кишиким, сўфий дедилар, ул эрди. Асли Куфа шаҳридан бўлиб, Шомда шайхлик қиларди. Сўфийларнинг илк хонақоҳи Шомнинг Рамласида бино топган бўлиб, тарихи қуйидагича: Насронийларнинг бир улуғи овга бораётган эди. Йўлда икки дарвешни кўриб қолди. Дарвешлар бир-бирига етишиб, муҳаббат юзидан кўришдилар ва бир-бирига илтифот кўрсатиб, бир жойда ўтириб, ёнларида егуликдан нимаики бор эса, ўртага қўйиб, тановул қилдилар. Сўнг тавозе билан хайрлашиб, айрилишдилар.
Насроний амирига буларнинг муомалалари хуш келиб, бирини чақириб, сўради:
- Боя кўришганингиз сизга ким бўлади?
Деди:
- Ҳеч ким.
Сўради:
- Ким эди?
Дарвеш деди:
- Танимайман.
Яна сўради:
- Қаердандир?
Деди:
- Билмайман.
Насроний деди:
- Унда бу яқинлик орангизда қайдан пайдо бўлди?
Дарвеш деди:
- Бизнинг тариқатимиз одоби шудир.
Насроний яна сўради:
- Сизнинг жамоатингиз йиғиладиган жой борми?
Деди:
- Йўқ.
Деди:
- Мен бу ерда шундай бир манзил қураманки, унда сизлар йиғилишингизга имкон бўлар.
У Рамлада хонақоҳ ясади.