Дарвеш зиёрати, сарой ва гўзал канизак
Абулҳусайн Даррож Бағдоддан Юсуф бин Ҳусайн Розий зиёратига келди. Юсуф сўради:
- Нима юмуш билан келдинг?
Деди:
- Сенинг зиёратингга.
Яна сўради:
- Агар йўлда сенга биров бир муҳташам сарой ва бир гўзал канизак берса эди, сени менинг зиёратимдан қайтара олармиди?
Абулҳусайн деди:
- Билмайман. Тангри таоло мени бу иш билан имтиҳон қилмади...
Хожа Абдуллоҳ Ансорий дебдурки, яхши жавоб берибди. Аслида, бу саволни бермаслик керак эди.