СУННАТ НАМОЗЛАР РАКАТЛАРИНИНГ АДАДИ

Бировким, кеча-кундуз қилса тоат,
Эрур суннат анга ўн икки ракъат.
Ким кечаю кундуз тоат қилса, яъни беш маҳал намоз ўқийдиган бўлса, унга ўн икки ракат намоз суннат бўлади.
Имом Муслим, Абу Довуд ва Насоийлар Умму Ҳабиба розияллоҳу анҳодан ривоят қиладилар: «Расулуллоҳ соллаллоҳу алайҳи васаллам: «Қайси бир мусулмон банда ҳар куни фарздан ташқари ўн икки ракат ихтиёрий намоз ўқиса, Аллоҳ унга жаннатдан уй бино қилади», дедилар. Шундан буён уларни ўқиб келмоқдаман».
Ушбу ва шу маънодаги бошқа ҳадислардан келиб чиқиб, ҳанафий мазҳаби уламолари фарз намозларига қўшиб ўқиладиган суннат намозларидан ўн икки ракат таъкидланган суннат намозларни танлаб, белгилаб беришган. Ушбу бўлимда шу хусусда сўз бормоқда.

Икирар ракъат ўлди субҳ ила шом,
Ул икки тўртар англа барча айём.
Ҳар куни бомдод ва шомда икки ракатдан, нариги иккитасида (пешин ва хуфтонда) тўрт ракатдан.

«С»да ушбу байт бир оз бошқача:
Икирар англа субҳу хуфтану шом,
Яна пешинни олти барча айём.
Яъни ҳар кунги бомдод билан хуфтоннинг суннатлари икки ракатли, пешинники олти ракатли деб бил. Ҳанафийлар наздида, жумладан, диёримизда кенг тарқалган ва мўътабар саналган фатвога кўра, мана шу тақсим афзал ҳисобланади. Бу суннат намозлар суннати муаккада (таъкидланган суннат) бўлиб, фарзни тўлдиришга хизмат қилади.